Farbigs Glas
I wohne im ne achteggige Huus, wo uf der einte Häufti mit kunschtvoll gschtaltete, farbige Glasfänschter ipackt isch. Vo dinne gseht me use, aber vo dusse nid ine. Alli Fänschter si natürlich top isoliert.
Karussel
Ds Huus schteit uf ere kreisrunde Schine u dräit sich outomatisch nach der Sunne. Wes dusse chalt isch, luegt die glasigi Site zur Sunne u wes heiss isch, schirmt die isolierti Holzwand d’Schtralig ab. Für ds Lüfte, chan i ds Glasdach lüpfe, wie bi Tribhüser.
Um ds Huus ume hets es Trottoir, damit i grad dört ine oder use cha, wo d’Wohnigstüren isch. Die wanderet ja mit em Huus mit.
Im Zäntrum vom Huus hets e Schpringbrunne u nes Bandeli mit Blueme drum ume. Ds Liecht chunnt vo obe. Wes dusse ungmüetlich isch, tanzen i um das Inseli oder ligen im ne Ligischtuel dernäbe, u gniesse was isch oder lisen öppis.
Zum gliiche Fänschter use gsehn i immer wider anderi Landschaftsbilder, je nachdäm, wie z’Huus grad schteit. I bi also ging chli am reise, ohni z’verreise.
Mit de nöischte Solarzälle uf Sunnesägel, wird mi Schtrom produziert.
Schtärne beobachte
Ir Nacht lüchtet mis Huus wie ne farbige Edelschtei. U wen ig alli Liechter lösche, chan ig d’Schtärne bewundere dür ds glüpfte Dach. Wen ig dür ds Fernrohr luege, tuen ig ds Hus i die Richtig dräie, wo die schönschte Schtärnbilder, Galaxie u Planete si.
Garte mit unändlichem Schwümmbecki
Im Garte hets Büsch u Böim wo Frücht gä. Unger em ne Chegeleboum hets e runde Holztisch u Schtüel mit Chüssi druffe. Hie tüe mer zäme ässe, ploudere, baschtle u süsch no mängs.
Z’Schwümmbecki geit ringförmig um z’ganze Grundschtück ume. Es isch nid eso gross, wie ne Burggrabe. Ig cha aber drin ändlos schümme, ohni müess umz’cheere. Ds Huus schteit auso eigentlich uf emne Inseli. Am Rand vom däm natürliche Planschbecki schteit es Ritiplampi, won i drab abe i ds Wasser cha gumpe. Pflanze sorge derfür, dass z‘Wasser nid verschlammet, u Sunnekollektore häufe, dass ds Wasser warm blibt.
Das wär de Musig!
Hinger em Huus schteit e wasserdichte Flügu, wo sich säuber schtimmt. Die nächschte Nachbare si so wit ewägg, das i ohni Hemmige darf schpile.
Ir Nacht lan i mi vom Schtärnehimu und em Mond inschpiriere u klimpere druflos.
Ir cheutere Jahreszyt si d’Taschte gheizt.
Mängisch chunnt öpper u singt oder schpiut anderi Inschtrumänt derzue. Mir machen es Gartekonzärt. Das beflüglet mi.
Wettet dir o i so em ne Huus läbe? Oder finget dir‘s chli gschpunne?